બાળ કાવ્ય સંપદા/કીડીબહેન ભણવા ચાલ્યાં

કીડીબહેન ભણવા ચાલ્યાં

લેખક : જિગર જોષી ‘પ્રેમ’
(1987)

લીમડાના ઝાડ પાસે એક મોટી સ્કૂલ એમાં ભણવાની ચાલી છે ફૅશન
એમાં કીડીએ લીધું એડમિશન

નાનકડાં કીડીબહેન નાનકડા દફતરમાં નાનકડી પાટી લૈ આવે
કીડીબહેન ભણવામાં એવાં તે હોશિયાર; બાકીના સૌને શિખડાવે
સ્કૂલેથી છૂટીને રોજ રોજ ઝટપટથી કીડીબહેન કરતાં ભઈ લેસન
લીમડાના ઝાડ પાસે એક મોટી સ્કૂલ એમાં ભણવાની ચાલી ફૅશન
એમાં કીડીએ લીધું એડમિશન

મકોડાભાઈ સાવ ભણવામાં ઠોઠ એને ક ખ ગ આવડે નૈ કાંઈ
‘કીડીબહેન રોજ રોજ ટ્યૂશન કરાવશો’ ? એમ પૂછે છે મક્કોડાભાઈ
રોજ રોજ થોડું થોડું વાંચી લેવાનું ભાઈ રાખવાનું હોય કાંઈ ટ્યૂશન ?⁠
લીમડાના ઝાડ પાસે એક મોટી સ્કૂલ એમાં ભણવાની ચાલી છે ફૅશન
એમાં કીડીએ લીધું એડમિશન