બાળ કાવ્ય સંપદા/પૂછું છું
Jump to navigation
Jump to search
પૂછું છું
લેખક : ધીરેન્દ્ર મહેતા
(1944)
ફુગ્ગામાં હવા ભરાય એમ ગ્લાસમાં ભરું, ભરાય નહિ કેમ ?
પૂછું છું પપ્પાને એમ !
દડા પરપોટાના તરે આ પાણીમાં, ઝાલું ઝલાય નહિ કેમ ?
પૂછું છું પપ્પાને એમ !
ઊડતા પતંગ જેમ ચાંદા ને સૂરજને કાપું, કપાય નહિ કેમ ?
પૂછું છું પપ્પાને એમ !
શો-કેસમાં સૂનમૂન થઈ બેઠેલા પંખીથી ગાયું ગવાય નહિ કેમ ?
પૂછું છું પપ્પાને એમ !
ટીવીમાં પુરાયા ભેરુને મળવાને જાઉં, જવાય નહિ કેમ ?
પૂછું છું પપ્પાને એમ !
પાણીની જેમ જે વરસે એ તડકામાં, ન્હાવું નવાય નહિ કેમ ?
પૂછું છું પપ્પાને એમ !
આભેથી પડતા આ પાણીને ખોબે સમાવું, સમાય નહિ કેમ ?
પૂછું છું પપ્પાને એમ !