બાળ કાવ્ય સંપદા/હોળી
Jump to navigation
Jump to search
હોળી
લેખક : સોમાભાઈ ભાવસાર
(1911-1984)
રંગ લ્યો ને, રંગ લ્યો ને, હોળીનો રંગ લ્યો ને !
જીવનને રંગે ભરી દ્યો ને, હોળીનો રંગ લ્યો ને !
વગડે તો ફૂલડાંનાં લૂમખેલૂમખાં,
આંબે મંજરીઓનાં ઝૂમખેઝૂમખાં,
ચલો કુદરતનો સાજ પે'રી લ્યો ને, હોળીનો રંગ લ્યો ને !
રંગ લ્યો ને, રંગ લ્યો ને, હોળીનો રંગ લ્યો ને !
કરતી કલ્લોલ જુઓ પંખીની સેના,
ટહુકે કોયલ, બોલે પોપટ ને મેના,
કોઈ એને જઈ વાત એ કહો ને, હોળીનો રંગ લ્યો ને !
રંગ લ્યો ને, રંગ લ્યો ને, હોળીનો રંગ લ્યો ને !
શેરીમાં ફરતી'તી વાનરની ટોળી,
જઈને પિચકારીએ રંગ લે ઘોળી,
કહે હોળીનો પૈસો દ્યો ને, હોળીનો રંગ લ્યો ને !
રંગ લ્યો ને, રંગ લ્યો ને, હોળીનો રંગ લ્યો ને !