મંગલમ્/જીવનસાગર ઘાટ

જીવનસાગર ઘાટ

જીવન સાગર ઘાટ રે
મને કોણ બતાવે વાટ?
દિન ઊગે, દિન આથમે ને આથમે સૂરજ-સોમ;
વણ ખૂટ્યો મુજ પંથ પડ્યો છે,

⁠ક્યાં છે તારી ભોમ રે.

— મને…

આભમાં નિર્મલ તારક કો’ક દિ’ વરસે તેજની ધાર;
મારગની કાંઈ ઝાંખી પડે ત્યાં,

⁠ વીંટી વળે અંધકાર રે.

— મને…

જગના વાયે વાયરા ને મૂર્છિત પ્રાણ રૂંધાય;
ધ્રુવ શો ધ્રુવ તારક પણ ડોલે,

⁠ એકે ન પંથ ભળાય રે.

— મને…

કાળ સમોવડ તરંગ ઉપર ઊછળે આતમ નાવ;
અમૃત દીપક દાખવી તારો,

⁠ મંગળ પંથ બતાવ રે.

— મને…

— સ્નેહરશ્મિ