મધ્યકાલીન ગુજરાતી કાવ્યસંપદા /ચંદ્રાહાસાખ્યાન કડવું ૧

કડવું ૧

પ્રેમાનંદ

રાગ કેદારો

પ્રથમ સમરું ગણપતિ, જેમ ટળે મારી દુર્મતિ;
જેહથી સરે મનોરથ મન તણો રે.          ૧

સાર કરો, માતા સરસ્વતી! હું બાળક કાંઈ લેહેતો નથી;
સતી શારદા! સેવક છઉં તમ તણો રે.          ૨
ઢાળ
સાર કરો, માતા સરસ્વતી! હું લાગું તમારે પાય;
નિજ ગુરુ કેરું ધ્યાન ધરતાં ગ્રંથ ચાલતો થાય.          ૩

વૈશંપાયન એમ ઊચરે: સુણ, જનમેજ્ય રાજંન!
અશ્વમેઘની ઉત્તમ કથા છે, શ્રોત-વક્તા ધન્ય.          ૪