યોગેશ જોષીની કવિતા/આઠ (ધાવણ માટેની નસો...)

આઠ (ધાવણ માટેની નસો...)

(બ્રેસ્ટ કેન્સરગ્રસ્ત કવયિત્રીની અંગત ડાયરીમાંથી (નવ સંવેદનચિત્રો))

ધાવણ માટેની
નસો, ગ્રંથિઓ
તો નવજાતના
જીવનને પોષવા માટે.
હે કૅન્સર,
એ જ જગ્યા પસંદ પડી તને
ઊછરવા, ફેલાવા માટે?

હે કૅન્સર,
જીતવા નહીં દઉં તને કોઈ કાળે;
એક કુંભમાં
ભલે તેં ભરી દીધું વિષ
એ વિષભર્યો કુંભ
હટાવી દીધો છે મારા દેહમાંથી.
હા, બીજો કુંભ
છે મારી કને,
ઘાટીલો,
ભર્યો ભર્યો,
અ-મૃતથી...

થાય છે –
મારી છાતી
હવે જાણે
અર્ધ
નારીશ્વરની!