યોગેશ જોષીની કવિતા/જળ વગર હું તરફડું જળમાં રહી...

જળ વગર હું તરફડું જળમાં રહી...

જળ વગર હું તરફડું જળમાં રહી,
એક પળ પકડું હું ઝાકળમાં રહી!

પાંખ ફફડાવી ચહે છે ઊડવા,
આ બધાયે શબ્દ કાગળમાં રહી!

ઘર સુધી તારા કદી ના આવશે,
રોકતો હું રણને બાવળમાં રહી!

ગામ પરથી થૈ ગયાં તેઓ પસાર,
જળ ભરેલા એક વાદળમાં રહી!

એટલે ઘેરાય છે આ વાદળો,
હું ધરા ઊકેલતો હળમાં રહી!

ભેજ, માટી, તેજ ને બસ એક ક્ષણ,
રાહ જોઉં હું સતત ફળમાં રહી.