રમણીક સોમેશ્વરની કવિતા/કાંડી

૩૯ . કાંડી

બોલો ચતુર સુજાણ
કાંડી રે ચાંપીને કીધાં કેવા કમઠાણ

રોળી કાચા રે અળાયા કેરી રાખ
⁠કેવાં રે સંધૂકણ કીધાં સામટાં
⁠માગ્યો નેહ
⁠ને ખડકલા કીધા ચેહના
કેવા રાતા રે નવાણે રેલા નીતર્યા
⁠બધે તાણ તાણ તાણ
⁠બોલો, ચતુર સુજાણ

કાંડી તો રાંધણિયાની આબરૂ
⁠કાંડી ધીમો રે રવેશનો ઉજાસ
એમાં ભડભડ ભડકાઓ ક્યાંથી સાચવ્યા
⁠આ રે રમત કેવી આદરી
⁠ઊભાં કીધાં રમખાણ
⁠બોલો, બોલો, ચતુર સુજાણ.