સમગ્ર અરધી સદીની વાચનયાત્રા/કરસનદાસ માણેક/કોની છે આ ધીંગી ધરતી?

કોની છે આ ધીંગી ધરતી?
જીવનમાં અમૃતરસ ભરતી,
કોની છે આ ધીંગી ધરતી?
કૈંક શ્રીમંતો ને સરદારો
ઊગ્યા — આથમિયા દરબારો,
ચક્રવર્તીઓ થયા ચાલતા
બોલાવી ઘડીભર દેકારો,
ધરા તણી ધણી થઈને ફરતી
લાંબાં લશ્કર લઈ સરકારો :
તેય સૂતી સૌ સોડ તાણીને
મહાકાળનો થઈને ચારો!
ને એ સૌની મશ્કરી કરતી
હસી રહી આજે યે ધરતી!
એ જ લહેરથી વિશ્વ વિહરતી —
કોની છે આ ધીંગી ધરતી?