સમગ્ર અરધી સદીની વાચનયાત્રા/રવીન્દ્રનાથ ઠાકુર/આપો તો આટલું આપો રે!

૧

ભીડું મારી ભાંગો એવી કંઈ
કે હું તો જાચના જાચું નહીં!
આપો તો આટલું આપો રે, (૨)
કદી હું ભીડથી બીઉં નહીં!

દુઃખોની લાયમાં ટાઢક દઈ
દિલાસો ના દો તો કંઈ નહીં;
આપો તો આટલું આપો રે, (૨)
દુઃખોને જીતું સહી લઈ. …

૨

તમે મને તારજો તારણહાર!
કે એવી જાચના જાચું નહીં;
આપો તો આટલું આપો રે, (૨)
તરું પણ થાકે ના મારી દેહી!

ભારો મારો હળવો કરી દઈ,
દિલાસો ના દો તો કંઈ નહીં;
આપો તો આટલું આપો રે, (૨)
બધોયે ભાર શકું હું વહી.
હશે જ્યારે સુખનો ઉજ્જ્વળ દિન,
લળી લળી નીરખીશ તારું વદન;
દુઃખની જ્યારે રાત થશે ને

ભૂલશે સકળ મહી;
તે વારે આટલું આપો રે,
આપો તો આટલું આપો રે,
તમો પર આસ્થા તૂટે નહીં!
(અનુ. જુગતરામ દવે)
[‘ગુરુદેવનાં ગીતો’ પુસ્તક]