સાહિત્ય પલ્લવ – ભાગ ૨/ભગ્ન સ્વપ્નની નાવ

૧. ભગ્ન સ્વપ્નની નાવ

ઝીણાભાઈ દેસાઈ - ‘સ્નેહરશ્મિ’

⁠મારી નાવ કરે કો પાર?

કાળાં ભમ્મર જેવાં પાણી.
⁠જુગ જુગ સંચિત રે! અંધાર.
સૂર્ય ચંદ્ર નહિ, નહિ નભ જ્યોતિ,
⁠રાત દિવસ નહિ સાંજ સવાર!
⁠મારી નાવ કરે કો પાર?

ભાવિના નહિ પ્રેરક વાયુ,
⁠ભૂત તણો દાબે ઓથાર,
અધડૂબી દીવાદાંડી પર
⁠ખાતી આશા મોત-પછાડ!
⁠મારી નાવ કરે કો પાર?

નથી હીરા, નથી માણેક, મોતી
⁠કનક તણો નથી એમાં ભાર.
ભગ્ન સ્વપ્નના ખંડિત ટુકડા
⁠તારી કોણ ઉતારે પાર?
⁠મારી નાવ કરે કો પાર?