સિગ્નેચર પોયમ્સ/અમર આશા – મણિલાલ નભુભાઈ દ્વિવેદી

અમર આશા

મણિલાલ નભુભાઈ દ્વિવેદી

કહીં લાખો નિરાશામાં, અમર આશા છુપાઈ છે;

ખફા ખંજર સનમનામાં, રહમ ઊંડી લપાઈ છે.

– કહીં

જુદાઈ જિંદગીભરની, કરી રો રો બધી કાઢી;

રહી ગઈ વસ્લની આશા, અગર ગરદન કપાઈ છે. ⁠

– કહીં

ઘડી ના વસ્લની આવી, સનમ પણ છેતરી ચાલી;

હજારો રાત વાતોમાં, ગમાવી એ કમાઈ છે.

– કહીં

જખમ દુનિયા જબાનોના, મુસીબત ખોફનાં ખંજર;

કતલમાંયે કદમબોશી, ઉપર કયામત ખુદાઈ છે.

– કહીં

શમા પર જાય પરવાના, મરે શીરીં ઉપર ફરહાદ;

અગમ ગમની ખરાબીમાં, મજેદારી લૂંટાઈ છે.

– કહીં

ફના કરવું ફના થાવું, ફનામાં શહ્ સમાઈ છે;

મરીને જીવવાનો મંત્ર, દિલબરની દુહાઈ છે.

– કહીં

ઝહરનું નામ લે શોધી, તુરત પી લે ખુશીથી તું;

સનમના હાથની છેલ્લી, હકીકતની રફાઈ છે.

– કહીં

સદા દિલના તડપવામાં, સનમની રાહ રોશન છે;

તડપતે તૂટતાં અંદર, ખડી માશૂક સાંઈ છે.

– કહીં

ચમનમાં આવીને ઊભો, ગુલો પર આફરીં થઈ તું;

ગુલોના ખારથી બચતાં, બદનગુલને નવાઈ છે.

– કહીં

હજારો ઓલિયા મુરશિદ, ગયા માશુકમાં ડૂબી;

ન ડૂબ્યા તે મૂઆ એવી કલામો સખ્ત ગાઈ છે.

– કહીં