સિગ્નેચર પોયમ્સ/આતમરામ – રા. વિ. પાઠક ‘શેષ’

આતમરામ

રામનારાયણ વિ. પાઠક ‘શેષ’

હજીયે ન જાગે મારો આતમરામ! (૨)
સમુંદર ઘુઘવે છે દૂર, વાયુ સૂસવે ગાંડોતૂર!

સમજું ના ભરતી કે આવે છે તુફાન...

હજીયે∘︎

સઢ સંધા ફડફડે, દોર ધિંગા કડકડે!
હાજર સૌ ટંડેલ એક મારાં સૂનાં છે સુકાન!

મારાં સૂનાં છે સુકાન!

હજીયે∘︎

વહાણ રાખું નાંગરેલું, વેપાર શી રીતે ખેડું?

સવાયા થાશે કે જાશે મારા મૂળગાય દામ! ⁠

હજીયે∘︎

હવે તો થાય છે મોડું વીનવું હું પાયે પડું,
મારે તો થાવા બેઠો છે ફેરો આ નકામ!
મારો ફેરો આ નકામ!...
જાગોજી જાગોજી મારા આતમરામ!
વ્હાલા આતમરામ!