સિગ્નેચર પોયમ્સ/ગઝલ (ક્યાંક ઝરણાની...) – શ્યામ સાધુ

ગઝલ

શ્યામ સાધુ

ક્યાંક ઝરણાની ઉદાસી પથ્થરો વચ્ચે પડી છે,
⁠ક્યાંક તારી યાદની મોસમ રડી છે!

દોસ્ત, મૃગજળની કથા વચ્ચે તમે છો,
⁠આ જુઓ અહિંયાં તરસ, ત્યાં વાદળી ઊંચે ચડી છે.

પંખીઓના ગીત જેવી એક ઇચ્છા ટળવળે છે,
⁠ઓ હૃદય! બોલો કે આ કેવી ઘડી છે.

આવ મારા રેશમી દિવસોના કારણ,
⁠જિંદગી જેને કહે છે એ અહીં ઠેબે ચડી છે.

ઓ નગરજન! હું અજાણ્યા દેશનો થાક્યો પ્રવાસી,
⁠લાગણી નામે હવેલી ક્યાં ખડી છે?