સિગ્નેચર પોયમ્સ/પ્રાર્થના – સ્નેહરશ્મિ

પ્રાર્થના

સ્નેહરશ્મિ

⁠મારી નાવ કરે કો પાર?

કાળાં ભમ્મર જેવાં પાણી,
⁠જુગ જુગ સંચિત રે! અંધાર;
સૂર્યચન્દ્ર નહિ, નહિ નભજ્યોતિ,
⁠રાત દિવસ નહિ સાંજસવાર!
⁠મારી નાવ કરે કો પાર?

ભાવિના નહિ પ્રેરક વાયુ,
⁠ભૂત તણો દાબે ઓથાર;
અધડૂબી દીવાદાંડી પર,
⁠ખાતી આશા મોતપછાડ!
⁠મારી નાવ કરે કો પાર?

નથી હીરા, નથી માણેક, મેાતી,
⁠કનક તણો નથી એમાં ભાર;
ભગ્ન સ્વપ્નના ખંડિત ટુકડા
⁠તારી કોણ ઉતારે પાર?
⁠મારી નાવ કરે કો પાર?