હેમંત ધોરડાનાં ચૂંટેલાં કાવ્યો/હવા શરીરનું ને ચાંદની લિબાસનું નામ

હવા શરીરનું ને ચાંદની લિબાસનું નામ

હવા શરીરનું ને ચાંદની લિબાસનું નામ
ન કોઈ યાદમાં સચવાયલી સુવાસનું નામ.

તને ય તારી કોઈ વાત હું કહી ન શકું
ન કોઈ સ્પર્શનું શિર્ષક ન કોઈ શ્વાસનું નામ.

ફકત ભીનાશ પ્રસરતી જતી ભીનાશ ફકત
ન કોઈ ધારની ઓળખ ન કોઈ ચાસનું નામ.

તિમિર અજાણ સ્થગિત રોમ રોમ ચુપકીદી
વરસતા વાતાવરણમાં તરલ ઉજાસનું નામ.

ક્ષિતિજ પાર કોઈ દૃશ્ય ખૂલતું કે નહીં
ઊઘડતું ખૂલતું આંખોમાં આસપાસનું નામ.