કાવ્ય-આચમન શ્રેણી – ઝવેરચંદ મેઘાણી/૨૫. કાલ જાગે!: Difference between revisions

ઇન્સાફી તખ્ત પર કરાલ કાલ જાગે;

નૌતમ દુનિયાનો સ્વર્ણ-સૂર્યોદય લાગે.

રક્તે ધોવાય; જાલિમોનાં દળ ભાંગે;

ઇન્સાફી તખ્ત પર કરાલ કાલ જાગે –

દેવા દુષ્ટોને દંડ ઘોર કાલ જાગે.

પશુના ગોવાલ સમ નિયંતા નવ જોઈએ;

મુક્તિને પર્વ મેળ મનના મેળવીએ.

કૂટ કૂટ બેડી લોક-પ્રાણ કેદ ત્યાગે;

ઇન્સાફી તખ્ત પર કરાલ કાલ જાગે –

દેવા પાપીને દંડ ઘોર કાલ જાગે.

ભોળાં કંગાલ કાજ ફાંસલા પસારે;

સત્તાના ભક્ત આજ શોષે કરભારે.

બંધુત્વે વહ્યા પ્રાણ નવરચના માગે;

ઇન્સાફી તખ્ત પર કરાલ કાલ જાગે –

દેવા ઘાતીને દંડ ઘોર કાલ જાગે.

ખેડુનાં, ખાણિયાનાં, ઉદ્યમવંતોનાં;

બનતા ધનવાન-જ્ઞાનવાન તેનું સ્થલ ના:

તમ વ્હોણો સૂર્ય કાલ તપવું નહિ ત્યાગે;

પૃથ્વીના પાટ પર કરાલ કાલ જાગે.

અંગ્રેજી કાવ્ય પરથી ‘સૌરાષ્ટ્ર’ પત્રના મુખપૃષ્ઠ પર મૂકવા માટે રચાયું. મારું સૌપહેલું પીડિત-ગીત. [યુજીન પોત્તીએરે રચેલું ફ્રેન્ચ કાવ્ય ‘લ ઇન્તરનાશિયોનાલ’ આંતરરાષ્ટ્રીય સમાજવાદી હિલચાલનું અગ્રગાન બનેલું, અને ૧૯૧૭-૧૯૪૪ દરમિયાન રશિયન અનુવાદિત સ્વરૂપે એ સોવિયેત સંઘનું રાષ્ટ્રગીત પણ રહ્યું. કાવ્યના અનેક અંગ્રેજી અનુવાદો છે એ પૈકી ચાર્લ્સ હોપ કેરનો જે અનુવાદ મળી આવ્યો એ નીચે આપ્યો છે.]