આધુનિક સાહિત્યસંજ્ઞા કોશ/સંજ્ઞાકોશ/K

સંજ્ઞાકોશ
K

Kabuki કાબુકી

જાપાનના પ્રચલિત નાટ્યનો એક પ્રકાર, ૧૭મી સદીમાં અસ્તિત્વમાં આવેલો આ નાટ્યપ્રકાર અન્ય જાપાનીઝ નાટ્યપ્રકાર ‘નૉ’ (No) સાથે કેટલુંક સામ્ય ધરાવે છે. કાબુકીના પ્રયોગમાં પુરુષ-નટો જ સ્ત્રીપાત્રો ભજવે છે, પરંતુ ‘નૉ’ (No)ની માફક કલાકારો મહોરાં પહેરતાં નથી.

કાબુકીના ત્રણ પ્રકારો છે : ઐતિહાસિક (Jidaimono), સામાજિક (sewamono) નૃત્ય-કાબુકી (Shosagoto).

Katharsis વિરેચન

જુઓ : Catharsis

Kenosis રિક્તીકરણ

જુઓ : Influence, the anxiety of

Kimstlerroman સર્જકનવલ

સર્જક કે કલાકારના વિકાસ પર કેન્દ્રિત નવલકથા

Kitchen-Sink Drama કામદાર નાટ્ય

વીસમી સદીના પાંચમા દાયકા દરમ્યાન આર્નલ્ડ વેસ્કર, જોન ઓઝબર્ન તથા ઍલન ઓઈન જેવા નાટ્યકારોએ મજૂર સમાજના રોજિંદા જીવનના પ્રસંગોને આધારે નાટકો લખ્યાં. આ નાટકોને ઉતારી પાડવાના હેતુથી પ્રયોજવામાં આવેલી આ સંજ્ઞા હાલમાં તટસ્થ અર્થમાં નિશ્ચિત સમયગાળાના શોષિત સમાજને લગતાં નાટકો માટે ઉપયોગમાં લેવાય છે.

વેસ્કરના નાટક ‘ધ કિચન’ ઉપરથી પણ આ સંજ્ઞા આપી હોવાનું મનાય છે. સામાજિક નાટ્ય-લેખનના એક મહત્ત્વના પ્રકારનું અહીં સૂચન છે.

Kitsch અસાર સાહિત્ય

જુઓ : Subliterature