કંસારા બજાર/વિસ્તરે છે રણ

વિસ્તરે છે રણ

તળાવમાં તળિયે પથરાયેલા માટીના થર
જે ક્યારેક તળાવમાં ન્હાવા પડેલા કિશોરોના
જીવ ખેંચી લે તેવા લપસણા હતા
તે આજે,
નજર સામે નિષ્પાપ દેખાય છે.
વસૂકી ગયેલી ગાય જેવી એક સ્ત્રી
વાછરડાના મૃત દેહને પંપાળી રહી છે.
રણવચાળે એક ઘુડખર
નિષ્પલક ઊભું છે.
સમજાતું નથી કે આજે,
અનરાધાર વરસાદ વચ્ચે પણ
દુકાળનાં આ દશ્યો કેમ નજર સામે તરવરે છે?
લીલાંછમ વૃક્ષો પર નથી ઠરતી મારી આંખ.
ત્વચા પ૨ જીવી રહ્યું છે,
અવિરત એક રણ.
જંગલી બાવળ ચૂસી રહ્યા છે, શરીરના ક્ષાર.
રણના એક છેડેથી બીજે છેડે
દોડે છે ઘુડખર, વેગથી,
વિસ્તરે છે, રણ, બમણા વેગથી.