બાળ કાવ્ય સંપદા/નાના થૈને રે !
લેખક : ઝવેરચંદ મેઘાણી
(1894-1947)
નાના થૈને, નાના થૈને, નાના થૈને રે,
બાપુ ! તમે નાના થૈને રે
મારા જેવા નાના થૈને રે,
છાના માના રમવા આવો ! નાના થૈને રે.
નાના કેવી રીતે થાવું,
આવો બાપુ ! રીત બતાવું,
ટીંકા, પાટુ, પીવું, ખાવું,
શેરી વચ્ચે નાચવા આવો,
ઓળકોળાંબે હીંચવા આવો,
બોથડ મોટી મૂછ બોડાવો
સૂરજ ભૈની નાનકી છોડી,
કૂરડિયે કંકુડાં ઘોળી,
દા’ડી દા’ડી આવે દોડી
ડુંગર ઉપર જઈ બોલાવો,
ઉષા બેની, આવો આવો !
એની પાસે ગાલ રંગાવો
નાને માથે નાનકડી પાંથી,
દૈશ હું ઓળી મીંડલાં ગૂંથી,
જોજો રાતે નાખતા ચૂંથી
ઝભ્ભે ઝાઝાં રાખજો ખીસાં,
માંહી પાંચીકા વીણશું લીસા,
કાગળ, બાગળ, રૂપિયા પૈસા
ખેંચી દોરી ખૂબ હીંડોળે,
થાકેલી બા જાશે ઝોલે,
ભાગી જાશું બેઉ ભાગોળે
વેળુ વચ્ચે વીરડા ગાળી,
વાંકે ઘૂંટણ પીશું પાણી,
ગોવાળ આવે ગાડર જાણી
લીંબોળીનાં લૂમખાં લેવા,
ઝૂંમશું ઝાડે વાંદર જેવા,
પંખીડલાંના ખાશું મેવા
ખેતર કોતર ખીણ ઓળંગી,
જોઈ વાદળીઓ રંગબેરંગી,
ઘૂમશું ડુંગર જંગી જંગી
નાની આંખે નાનકાં આંસુ,
બાની સાથે રોજ રિસાશું,
ખાંતે એના ધબ્બા ખાશું,
ગોળે જૈને રે.
નાના થૈને, નાના થૈને, નાના થૈને રે !