વિનોદ જોશીનાં કાવ્યો/હાથે કરીને: Difference between revisions
Jump to navigation
Jump to search
હાથે કરીને
(+1) |
(No difference)
|
Latest revision as of 00:28, 21 February 2024
હાથે કરીને અમે અજવાળાં માગ્યાં
હવે અંધારાં બાર ગાઉ છેટાં...
આમ તો પરોઢ સાવ પોચું કે
ઝાકળની પાનીએય પડે નહીં છાલાં,
પાંદડીએ પાંદડીમાં ઝૂલે આકાશ
અડે મખમલિયા વાયરાઓ ઠાલા;
સૂરજનાં કિરણોની આંગળિયે નીકળેલ
સપનાના હોય નહીં નેઠા...
મેંદીની ભાત હોય ઘાટી મધરાત હોય
અંજળની વાત હોય છાની,
સોનેરી સેજ હોય રૂપેરી ભેજ હોય
ભીતરમાં કેદ હોય વાણી;
હાથવગા ઓરતાને ઝંઝેડી સાવ તમે
ઉઘાડી આંખ કરી બેઠાં...