સંજુ વાળાનાં કાવ્યો/ચત-બઠ: Difference between revisions
Jump to navigation
Jump to search
ચત-બઠ
(+1) |
(No difference)
|
Latest revision as of 00:46, 22 February 2024
એમાં શું કરવી ચત-બઠ
તું પણ શઠ ’ને હું પણ શઠ
ગાંઠ વળી ગઈ છે નિંગઠ
થાય નહિ પાંચમની છઠ
છૂટક – છૂટક કે લાગઠ
ફેરા ફરવાના અડસઠ
ફતવા, ડંકા, તાબોટા
સૌને સૌના નિજી મઠ
તારા સિંહાસન સામે
અમેય લે ઢાળ્યો બાજઠ
તારે શું તડકો? શું ટાઢ?
ઓ... રે! પૂતળી સુક્કીભઠ
અહીંથી હવે ઊડો ગઝલ!
બહુ જામી છે હકડેઠઠ
અક્ષરનેય ભાંગ્યા, તોડ્યા
બાળક જેવી લઈને હઠ
અવળે હાથે પીધો અર્ઘ્ય
અકોણાઈ ઊગી લાગઠ
‘અહાલેક’ –ની સામે બીજો
નાદ કોઈ માંડે ના બઠ
તારે કારણ કે નરસિંહ!
વૈષ્ણવજન આખું સોરઠ
અકોણાઈ : અવળચંડાઈ