હેમંત ધોરડાનાં ચૂંટેલાં કાવ્યો/મારી ભીનપ એના કિરણોથી વધાવી લઈ જશે

મારી ભીનપ એના કિરણોથી વધાવી લઈ જશે
ભરબપોરે સાત રંગોમાં સજાવી લઈ જશે.

અંધકારે આ અટકવું આ ભટકવું ડગ ડગર
ઝળહળીને ખુદ મને એ ઝગમગાવી લઈ જશે.

સ્થિરપણે એકીટશે એને સતત જોયા કરું
એ મને જોશે ને આંખો પટપટાવી લઈ જશે.

પાંખડી પર ઝીલી લેશે ઝીણી ઝાકળમાં મને
એ મને ઝરમરમાં પાંપણ પર ઉઠાવી લઈ જશે.

ફીણ થઈને એ છવાશે મારી માટી પર પ્રથમ
ને પછી મોજામાં આવીને વહાવી લઈ જશે.

શબ્દ પણ મારા બધા એના ને મારું મૌન પણ
લઈ જશે મારી ગઝલ પણ ગુનગુનાવી લઈ જશે.