રમણીક અગ્રાવતની કવિતા/વળામણાં

૩૨. વળામણાં

શેરી લાંબી કે લાંબું ફળિયું જી રે
પગલાં ખૂંટે કે ખૂંટે પ્રાણ જો
⁠કેમ વળાવી મારી લાડકી જી રે...

ઊંડી શેરીમાં હજી કોણ રમે જી રે
આઘે આઘેથી આવે સાદ જો.
⁠કેમ વળાવી મારી લાડકી જી રે...

ખખડી ડેલી કે કાંઈ પગ પડ્યા જી રે
કોનો આ ભીંજવતો બોલાશ જો.
⁠કેમ વળાવી મારી લાડકી જી રે...

ઘડીક ભણકાર આવે બારણે જી રે
ઘડીક બારી ગણગણતી ગીત જો.
⁠કેમ વળાવી મારી લાડકી જી રે...

મહિના જાશે ને વરસો વીતશે જી રે
સાસરવાટે દીકરી ક્યાં સમાઈ જો.
⁠કેમ વળાવી મારી લાડકી જી રે...