બાળ કાવ્ય સંપદા/ઝાડની ડાળીએ ઝૂલ્યાં

ઝાડની ડાળીએ ઝૂલ્યાં

લેખક : રેખા ભટ્ટ
(1960)

અમે ઝાડની ડાળીએ ઝૂલ્યાં,
⁠કે ઝાડ જરી લીલું થયું,
અમે તાળી લઈ-દઈ ખીલ્યાં
⁠કે પંખીનું ટોળું થયું...
અમે થોડું ચડ્યાં ને ઊતર્યાં,
⁠કે ઝરણું દડતું થયું.
અમે નીર નદીનાં ઉછાળ્યાં
⁠કે પાણીને હસવું ચડ્યું.
અમે કિલકારી કરી કરી કૂદ્યાં
⁠કે આભને ઝૂકવું પડ્યું,
અમે મૂકીને મનડું નાચ્યાં
⁠કે વાદળું વરસી પડ્યું...
અમે મીઠાં મધુર ગીત ગાયાં,
⁠કે ચંદાને ઊગવું પડ્યું,
અમે એવાં મસ્તીમાં ઝૂમ્યાં,
⁠કે આભલું ઝળહળ્યું.