ધ્વનિ/પોયણીએ ઊંચું જોયું રે આકાશમાં

૮. પોયણીએ ઊંચું જોયું રે આકાશમાં

પોયણીએ ઊંચું જોયું રે આકાશમાં

⁠કોણને એ મ્હોતી,
⁠ને નેણભરી જોતી?
⁠શું જાણ એને ન્હોતી?
–કે ચાંદલો બંધાણો પાણીના પાશમાં.
પોયણીએ ઊંચું જોયું રે આકાશમાં.

⁠તમરાંએ ગાન મહીં
⁠વાયરાને કાન કહી,
⁠વંન વંન વાત વહી,
‘ઢૂંઢતી એ કોને રે આટલા ઉજાશમાં?’
પોયણીએ ઊંચું જોયું રે આકાશમાં.

⁠અંકમાં મયંક છે,
⁠ન તો ય જરી જંપ છે,
⁠અંગમાં અનંગ છે,
શી બ્હાવરી બનેલ અભિલાષના હુતાશમાં!
પોયણીએ ઊંચું જોયું રે આકાશમાં.
૪-૪-૪૯