કાવ્ય-આચમન શ્રેણી – પ્રજારામ રાવળ/ભીની ભીની લહેર

૩૩. ભીની ભીની લહેર

ભીની ભીની લહેર આવી આ,
⁠વાયરાકેરી ભીની :
વ્હાલો મારો વરસ્યો કહીંક; –
⁠શીળી લહેર તહીંની. ૪
આછી આછી ગન્ધ આવી આ,
⁠ગન્ધવતીની મીઠી;
વ્હાલા મારાએ મોકલી જાણે;
⁠એની આગોતરી ચીઠી. ૮
ઝીણી ઝીણી ફરફર અડી આ,
⁠વ્હાલથી અંગે અંગ :
અડક્યા ભેળો ઊછળી રહે
⁠ઉરમાંથી ઉમંગ. ૧૨
ઈશાની દિશાએ ઉતાવળા
⁠હાથે લખાતી કો લિપિ :
ઊજળી ઊજળી સોનેરી શાહીમાં
⁠વળી વળી, રહી દીપી! ૧૬
કોઈ હવા જાગી જાય અચાનક;
⁠ઘૂમી રહે અણદીઠી.
રાજી રાજી ધરતી; – અંગે
⁠અંગ શું ચોળી પીઠી! ૨૦

તા. ૩૧-૭-૧૯૭૮

(‘નૈવેદ્ય’, પૃ.૩૬)

(અમદાવાદમાં)