બાળ કાવ્ય સંપદા/સપનાંની દુનિયા

સપનાંની દુનિયા

લેખક : જિતુ ત્રિવેદી
(1956)

ચકલી કરતી હૂપાહૂપ
ને વાનર કરતો ચીંચીં,
વેંત એકના વાનરભાઈ
ને ચાર ફૂટની ચકલી,
એવું અમને સપનું આવ્યું, અસલી હોય કે નકલી !

ચામાચીડિયું ચણતું ફળિયે
કાબર ડાળે લટકી,
સિંહને બટકું ભરી ગયેલ
ઘેટાથી સિંહણ ડરતી,
સાચી હોય કે ખોટી, દુનિયા સપનાંની બહુ ગમતી !

પાણી ભરતી કીડીબહેનની
અમે જ્યાં ગાગર ઢોળી,
કીડી અમારી પાછળ દોડી
ભાગી આખી ટોળી,
સપનું પણ ભાગી જ ગયું, જ્યાં જરાક આંખો ચોળી !