કાવ્ય-આચમન શ્રેણી – ન્હાનાલાલ/૨૪. ઊગે છે પ્રભાત

૨૪. ઊગે છે પ્રભાત

ઊગે છે પ્રભાત આજ ધીમે ધીમે;
ઊગે છે ઉષાનું રાજ્ય ધીમે ધીમે;
ઊગે છે પ્રભાત આજ ધીમે ધીમે...

રજનીની ચૂંદડીના
છેડાના હીરલા શા,
ડૂબે છે તારલા આજ ધીમે ધીમે;
ઊગે છે પ્રભાત આજ ધીમી ધીમે...

પરમ પ્રકાશ ખીલે,
અરુણનાં અંગ ઝીલે;
જાગે પ્રભુ વિશ્વમાં આજ ધીમે ધીમે;
જાગે પ્રભુ જીવમાં આજ ધીમે ધીમે;
ઊગે છે પ્રભાત આજ ધીમે ધીમે...

(ન્હાનાલાલનાં શ્રેષ્ઠ કાવ્યો, સં. નિરંજન ભગત તથા અન્ય પૃ. ૫૦)