બાળ કાવ્ય સંપદા/વૃક્ષો છે વહાલાં

વૃક્ષો છે વહાલાં

લેખક : ભૂપેન્દ્ર વ્યાસ ‘રંજ’
(1947)

છેદો ના વૃક્ષોના ડાળા,
ડાળો પર પંખીના માળા,
ગાતાં એ આનંદે ગાણાં,
⁠વૃક્ષો છે વહાલાં.

આપે છે ફળફૂલો સારાં,
વૃક્ષો છે કેવાં હરિયાળાં !
કરતાં એ સૌને હરિયાળાં !
⁠વૃક્ષો છે વહાલાં.

ડાળડાળ પળમાં ચઢનારાં,
કૂદી કૂદી નીચે પડનારાં,
અમે બાળ ડાળે ઝૂલનારાં,
⁠વૃક્ષો છે વહાલાં.

વૃક્ષોને પાઈએ જલધારા,
વરસાવે વૃક્ષો જલધારા,
નવડાવે અમને જલધારા,
⁠વૃક્ષો છે વહાલાં.