તુલસીનું પાંદડું
મેં તો તુલસીનું પાંદડું બિયરમાં નાખીને પીધું
ઘાસભરી ખીણમાં પડતો વરસાદ
ક્યાંક છૂટાછવાયાં ઢોર ચરતા
ભૂલકણી આંખનો ડોળો ફરે ને
એમ પાંદડામાં ટીપાંઓ ફરતા.
મેં તો આબરુના કાંકરાથી પાણીને કુંડાળું દીધું
પાણીનાં ટીપાંથી ઝગમગતા ઘાસમાં
નભના ગોવાળિયાઓ ભમતા
ઝૂલતા કદંબના ઝાડમાંથી મોઈને
દાંડિયો બનાવીને રમતા
મેં તો વેશ્યાના હાથને સીતાનું છૂંદણું દીધું
મેં તો તુલસીનું પાંદડું બિયરમાં નાખીને પીધું
***