બરફનાં પંખી/બહારવટિયાનું ગીત

બહારવટિયાનું ગીત

મારા નામે ચોકડી હું તો ચોકડિયાળો જીવજી
બકરી કંઠે આંચળ પકડી લટકે સત્યમ્ શિવજી

ખાલી અમથું પકડી રાખ્યું પારા જેવું કરમાંજી
ભાષાનું ખાંપણ ઓઢીને લાશ પડી ગઈ ઘરમાંજી

ધિંગાણાની ગમાણમાંથી બકરી બોલી ગાંધીજી
કલ્પવૃક્ષની ડાળે કોણે જાસાચિઠ્ઠી બાંધીજી

ચણોઠીઓના ઢગલે દાઝ્યા કૈંક કવિના કિત્તાજી
શબ્દોમાં હું એમ પ્રવેશ્યો જેમ આગમાં સીતાજી

હજીયે કાળી કોતર વચ્ચે આંખ ફફડતી રાતીજી
સાંઢણીઓના વેગે ધબકે પવન ભરેલી છાતીજી

કાયમ માટે બંધ ભલેને હોય ગામનો ઝાંપોજી
શબ્દોના કાગળિયે મેં તો અક્ષર પાડ્યો ઝાંખોજી

મારા નામે ચોકડી હું તો ચોકડિયાળો જીવજી
બકરી કંઠે આંચળ પકડી લટકે સત્યમ્ શિવજી

***