બાળ કાવ્ય સંપદા/વર્ષારાણી વરસે છે

વર્ષારાણી વરસે છે

લેખક : સંજય બાપોદરિયા ‘સંગી’
(1977)

વરસે છે રે વરસે છે !
વર્ષારાણી વરસે છે !
ગરજે છે રે ગરજે છે
મેઘરાજા ગરજે છે !
ઝબકે છે રે ઝબકે છે !
વીજળી ઝબૂક ઝબકે છે !
ગહેકે છે રે ગહેકે છે !
મોરલા ટેહૂંક ગહેકે છે !
લહેરે છે રે લહેરે છે !
વાયુ ઠંડો લહેરે છે !
મહેકે છે રે મહેકે છે !
માટી ભીની મહેકે છે !
દમકે છે રે દમકે છે !
જંગલ-ઝાડવાં દમકે છે !
છલકે છે રે છલકે છે !
નદી-નાળાં છલકે છે !
ભીંજે છે રે ભીંજે છે
બાળકો મન મૂકી ભીંજે છે !
હરખે છે રે હરખે છે !
કૃષીવલ ઉમંગે હરખે છે !
ઘમકે છે રે ઘમકે છે !
ધોરી-ઘૂઘરાં ઘમકે છે !
મલકે છે રે મલકે છે
મોલ-મોલાત મલકે છે !