યુરોપ-અનુભવ/ટ્રાવેલર્સ ચેક પાછા મળ્યા: Difference between revisions

લંડનમાં પહેલે દિવસે જ જ્યારે આ અન્ડરગ્રાઉન્ડ ટ્યૂબ રેલ્વેમાં કહો કે ભૂગર્ભ રેલ્વેમાં પ્રવાસ કર્યો, ત્યારે જ જોયું કે, અંદર કેટલી વિશાળ જગ્યા અને પૅસેન્જરો માટે વ્યવસ્થા હોય છે. વિજ્ઞાપનો પણ કેટલાં? કેવાં? અહીંની સંસ્કૃતિનો, વાણિજ્ય – વ્યવસ્થાપનનો ખ્યાલ આવી જાય. સૌથી મોટી વાત તો લંડનવાસીઓની સાથે સાથે રેલમુસાફરી થાય. તેમને નજીકથી ઓળખાવતો અવસર મળે. અમે પહેલી વાર, ગાડી આવતાં ઊભી રહી કે, એકાએક બારણાં ઊઘડી જતાં જોયાં, અને તે સાથે એક ચેતવણીનો સૂર સંભળાયો – Mind the gap. ગાડી ઊપડી નહિ ત્યાં સુધી રહી રહીને સંભળાય – Mind the gap. કારણ પછી સમજાયું – પ્લૅટફૉર્મ અને ટ્રેનના પગથિયા વચ્ચે જે થોડી જગ્યા હતી તેમાં કોઈ બેધ્યાનપણાને લીધે કે ઉતાવળથી ઊતરવા જતાં પડી ન જાય તે માટે આ સૂચના હતી. પછી તો જ્યાં સાવધાનીની જરૂર હોય ત્યાં અમે આ સૂત્ર બોલીએ. Mind the gap.

વેસ્ટ મિન્સ્ટર એબી સામે બીગ બેન ટાવરના મોટા કાંટા ૭.૨૭ બતાવતા હતા. હજી તડકો હતો. ત્યાં એક બોર્ડ જોયું : ‘We have come to the heart of the city.’ વેસ્ટ મિન્સ્ટરથી અંડરગ્રાઉન્ડ સ્ટેશન ઊતર્યાં. લંડન બ્રિજથી જૂના લંડન તરફ. મેટ્રો ટ્રેન લીધી. એકબે સ્થળે બદલી, વળી પાછા વેસ્ટ મિન્સ્ટર આવ્યા.