સોરઠી સંતવાણી/દેખાડું એ દેશ

દેખાડું એ દેશ

વીજળીને ચમકારે મોતી પરોવવું, પાનબાઈ!
નહીંતર અચાનક અંધાર થાશે,
જોતજોતામાં દિવસ વયા ગયા, પાનબાઈ!
એકવીશ હજાર છસોને કાળ ખાશે —
ભાઈ રે! જાણ્યા જેવી આ તો અજાણ છે, પાનબાઈ!
આ તો અધૂરિયાંને નો કે’વાય,
આ ગુપત રસનો ખેલ છે અટપટો,
આંટી મેલો તો પૂરણ સમજાય. — વીજળીને.
ભાઈ રે! નિરમળ થૈને આવો મેદાનમાં, પાનબાઈ!
જાણી લિયો જીવની જાત;
સજાતિ વિજાતિની જુગતિ બતાવું ને
બીબે પાડી દઉં બીજી ભાત. — વીજળીને.
ભાઈ રે! પિંડ બ્રહ્માંડથી પર છે ગુરુ, પાનબાઈ!
તેનો દેખાડું હું તમને દેશ,
ગંગા રે સતી એમ બોલિયાં રે
ત્યાં નહીં માયાનો જરીએ લેશ. — વીજળીને.

[ગંગાસતી]