અનેકએક/બુદ્‌બુદો

બુદ્‌બુદો

૧

ઊછળતા સમુદ્રમાં
બુદ્બુદો
બંધાઈ રહ્યા છે વીખરાઈ રહ્યા છે
બંધાઈ રહ્યા છે
બુદ્બુદ બંધાય
તો શું?
બુદ્બુદ વીખરાય તોય શું?


૨

તરંગો પર સવાર
બુદ્બુદો ઊડી રહ્યા છે
વેગીલા પવન સાથે
પ્રવેશી ગયેલો સૂર્ય
અનેક ઝબકારા વેરી રહ્યો છે
પછડાતા બુદ્બુદો
સમુદ્ર પર
સૂર્યતરંગો થઈ વહી રહ્યા છે

૩

બોલે નહિ
તો બુદ્બુદો પણ
સમુદ્ર જ છે

૪

સોનેરી રેતીમાં
બુદ્બુદો ઘેરાઈ ગયા છે
શંખ-છીપલાંમાં અટવાઈ ગયા છે
ઓટનો સમુદ્ર
આઘે આઘે જતો રહ્યો છે
રેતકણો વચ્ચે
બુદ્બુદો તતડી તતડી
તૂટી રહ્યા છે
શંખમાં ઝીણેરોે રવ પણ નથી


૫

બુદ્બુદોના પોલાણમાં
ઘુઘવાટનાં ઊંડાણ
વેગના ચકરાવા છે
તરંગોમાં
ઊંડે ઊતરી ગયેલ બુદ્બુદ બોલી બેસે
હું સમુદ્ર છું
સમુદ્રનું ચૂપ રહેવું
અને નહિ કે બુદ્બુદનું તૂટી જવું
બધું જ કહી દે

૬

સમુદ્ર
બુદ્બુદબોલીઓ બોલે
પવન ચૂમે
આકાશ જુએ
છીપ વીણે
રેતી શ્વસે
સમુદ્ર બોલે સમુદ્ર સાંભળે


૭

બુદ્બુદોથી
સમુદ્ર વીણ્યો વિણાય નહિ
ઊંચક્યો ઊંચકાય નહિ
ઝાલ્યો ઝલાય નહિ
અળગોઆઘોય થાય નહિ
બુદ્બુદોમાં
સમુદ્ર સમાવ્યો સમાય નહિ