હેમંત ધોરડાનાં ચૂંટેલાં કાવ્યો/મનમિચોલી રમતાં રમતાં આંખ ભમરાળું ભણે

From Ekatra Wiki
Revision as of 15:21, 29 June 2024 by Shnehrashmi (talk | contribs)
(diff) ← Older revision | Latest revision (diff) | Newer revision → (diff)
Jump to navigation Jump to search



મનમિચોલી રમતાં રમતાં આંખ ભમરાળું ભણે
એક પળ એ પાસપાસે ને બીજી પળ એ પણે

હમણાં અંબોડો અને હમણાં વળી એ ચોટલો
અબઘડી વાળે મને એ અબઘડી સાથે વણે

એને હું સર્વાંગે સરવો સાંભળું બસ સાંભળું
એ મને છેડે પ્રથમ પોતે પછી બહુ રણઝણે

રોજ એ છાંટે નજર આથી વધુ શું જોઈએ
દિન પ્રતિદિન હું વધુ ખીલું છું એનાં તોરણે

બંધ આંખો મલકે મલકે એનાં ખુલ્લાં નેણ પણ
મારે એ સંજીવનીથી ને જિવાડે મારણે