કાવ્ય-આચમન શ્રેણી – અમૃત ઘાયલ/રાખે છે એક લાગણી...

૩૯. રાખે છે એક લાગણી...

રાખે છે એક લાગણી મુજને અમીર જેમ,
હું એટલે તો આમ ફરું છું ફકીર જેમ.

એ શું કે બાગમાં ય રહીએ અસીર જેમ,
જંજીર તોડી નાખીએ આવો સમીર જેમ.

મન આપનું છે આપની મરજીની વાત છે,
કંચનની જેમ રાખો કે રાખો કથીર જેમ.

મારા સિવાય કોઈ નથી આસપાસમાં,
આ કોણ મુજને સ્પર્શી રહ્યું છે શરીર જેમ.

ઘર છોડવાનું હોય તો છોડી બતાવીએ,
ઘર ફૂંકવાની વાત છે આ તો કબીર જેમ.

બીજું તો કોણ શ્વાસનળીમાં હરેફરે,
ભટકું છું હું જ પંથભૂલ્યા રાહગીર જેમ.

છે આમ તો હજાર પરંતુ એ હાથ ક્યાં!
જે દોસ્ત થઈને દુ:ખમાં રહે દસ્તગીર જેમ.

આજે ય આયના મહીં ચણભણ થતી હતી,
આ કોણ છે જે આમ રહે છે અધીર જેમ.

‘ઘાયલ'ની ખેપમાં હતો શાયરનો દબદબો,
‘ગાલિબ'ની જેમ આવ્યો, ગયો પાછો ‘મીર' જેમ.

૨૬-૧-૧૯૬૯⁠(આઠોં જામ ખુમારી, પૃ. ૪૭૧)