બાળ કાવ્ય સંપદા/કેવી મજા !

કેવી મજા !

લેખક : ત્રિભુવન વ્યાસ
(1888-1975)

પહેલા વહેલા પરમેશ્વર ને –
બીજા ભારત મા,
ત્રીજાં મારાં માતાપિતાનો –
સેવક ચોથો આ;
કેવી મજા ! ભાઈ, કેવી મજા !

સેવાના મેવા કેવી મજા !
પહેલા રાજા પરમેશ્વર ને –
પછી બીજા રાજા,
ત્રીજા રાજા ગુરુજી રાજા –
હું ચોથો રાજા;
કેવી મજા ! ભાઈ, કેવી મજા !

બધાય રાજા કેવી મજા !
પહેલી પૂજા પરમેશ્વરની –
બીજી સંત-પૂજા,
ત્રીજી પૂજા માતપિતાની –
ચોથી દેશ-પૂજા;
કેવી મજા ! ભાઈ, કેવી મજા !
પૂજા ને પુણ્ય છે કેવી મજા !
ઘરમાં રમવું, બહાર રમવું –

નિશાળમાંયે રમવું,
રમતાં લાગે ભૂખ ત્યારે –
થોડું થોડું જમવું;
કેવી મજા ! ભાઈ, કેવી મજા !
રમવું ને જમવું કેવી મજા !