બાળ કાવ્ય સંપદા/ચાડિયાનું ગીત
Revision as of 03:15, 13 February 2025 by Meghdhanu (talk | contribs) (Created page with "{{SetTitle}} {{Heading|ચાડિયાનું ગીત|લેખક : કૃષ્ણલાલ શ્રીધરાણી<br>(1911-1960)}} {{Block center|<poem> ઊડો કાબર, ઊડો ચકલાં, ઊડો મેના પોપટ મોર; હું આ ખેતરનો રખવાળો, સઘળાં પેઠાં ક્યાંથી ચોર ? થોર તણી આ વાડ ઉગાડી, છીંડે બાવળ-કા...")
ચાડિયાનું ગીત
લેખક : કૃષ્ણલાલ શ્રીધરાણી
(1911-1960)
ઊડો કાબર, ઊડો ચકલાં,
ઊડો મેના પોપટ મોર;
હું આ ખેતરનો રખવાળો,
સઘળાં પેઠાં ક્યાંથી ચોર ?
થોર તણી આ વાડ ઉગાડી,
છીંડે બાવળ-કાંટ ભરી;
તોય તમે ક્યાંથી અહીં આવ્યાં ?
સંતાકૂકડી કેવી કરી ?
ઊડો કહું છું એટલું, હું શાણો રખવાળ;
ખેડૂત આવી જો ચડે, ગોફણ ઘાવ ઉછાળ.
મોતી-મૂઠશાં ડૂંડાં ઝૂલે,
લીલો નીલમડો શો મૉલ;
દાણો ઓછો એક ન થાશે,
માલિકને મેં દીધો કૉલ.
ખેડૂત આવે, ઊડી જાઓ,
એ જાતાં હું સાદ કરીશ;
ખોટા ખોટા ડોળા ફાડી,
છુપાઈને દાણા ધરીશ.
ઊડો કાબર, ઊડો ચકલાં,
ઊડો મેના પોપટ મોર;
હું આ ખેતરનો રખવાળો,
સઘળાં પેઠાં ક્યાંથી ચોર ?