બાળ કાવ્ય સંપદા/આવડે છે

આવડે છે

લેખક : રમેશ પારેખ
(1940-2006)

એકડો ન આવડે
બગડો ન આવડે
લંગડી લેતાં આવડે છે
મને લંગડી લેતાં આવડે છે

ત્રગડો ન આવડે
ચોગડો ન આવડે
વારતા કહેતાં આવડે છે
મને વારતા કહેતાં આવડે છે

પાંચડો ન આવડે
છગડો ન આવડે
ચપટી વગાડતાં આવડે છે
મને ચપટી વગાડતાં આવડે છે

સાતડો ન આવડે
આઠડો ન આવડે
મુન્ની રમાડતાં આવડે છે
મને મુન્ની રમાડતાં આવડે છે

નવડો ન આવડે
બવડો ન આવડે
કાન પકડતાં પકડતાં આવડે છે
મને કાન પકડતાં આવડે છે

દસડો ન આવડે
બસડો ન આવડે
ઊઠબેસ કરતાં આવડે છે
મને ઊઠબેસ કરતાં આવડે છે