બાળ કાવ્ય સંપદા/મોરલો નાચે

મોરલા નાચે

લેખક : ત્રિવેણી પંડ્યા
(1960)

રૂમઝૂમ કરતા નાચે, આ મોરલા રૂમઝૂમ નાચે;
વનવગડામાં રાચે, આ મોરલા રૂમઝૂમ નાચે.

રંગબેરંગી પીંછાં ફેલાવે,
ડગમગ ડગમગ ડોક ડોલાવે;
માથા પર કલગી સોહે, આ મોરલા રૂમઝૂમ નાચે.

તનડું ડોલાવે ને મનડું લોભાવે,
ટેંહુક-ટેંહુક કરી શોર મચાવે;
કળા કરી આનંદ છલકાવે, આ મોરલા રૂમઝૂમ નાચે.

ગોળ ગોળ ઘૂમે ને ચારેકોર ઘૂમે;
મસ્તીમાં મસ્ત થૈ, ઢેલ સંગ ઝૂમે;
નાચે ને સૌને નચાવે, આ મોરલા રૂમઝૂમ નાચે.