બાળ કાવ્ય સંપદા/એ પરપોટો

એ ૫૨પોટો

લેખક : પ્રીતમલાલ મજમુદાર
(1900-1991)

એ પરપોટો મોટો થયો,
બિલોરનો શું લોટો થયો !
કહીં મેઘધનુષનાં બાળ હતાં,
નહીં નરી આંખને ક્યાંય છતાં;
તે હોંસ કરીને
રૂપ ધરી
ને રંગ ધરી ને ભભક ધરી
પરપોટા પર આવ્યા ઊતરી,
ત્યાં પવન તણી ઊપડી લહરી.
એ પવનપંથ પર પરપોટો
તેજી ઊપડ્યો-શું લિસોટો !
ને તે પર સાતે બાળક એ
કિલકિલતાં લગામધારક એ.
ત્યાં પાછળ એકે ભૂલ કરી,
ને પરપોટાને એડ ભરી.
બસ ભૂલ થઈ, એ ભૂલ થઈ,
ને રંગસવારી ડૂલ થઈ.