બાળ કાવ્ય સંપદા/રમવાને આવો પોપટજી

રમવાને આવો પોપટજી

લેખક : ‘સ્નેહરશ્મિ’ ઝીણાભાઈ રતનજી દેસાઈ
(1903-1991)

‘આંબાની ડાળે બેઠા, પોપટજી !
રમવાને આવો હેઠા પોપટજી !’
‘મારે તો ઊડતા રહેવું, બટુકજી !
જોઈતું મેળવી લેવું, બટુકજી !’
‘જામફળ પાકાં પીળાં, પોપટજી !
દઉં વળી મરચાં લીલાં, પોપટજી !’
‘પારકું ધન નહિ લેવું, બટુકજી !
માથે ન રાખવું દેવું, બટુકજી !’
‘બચ્ચાં છે નાનાં માળે, બટુકજી !
થઈ જશે ઊડતાં કાલે, બટુકજી !’
‘કરવાની ત્યાં લગી ચોકી, બટુકજી !
લૂંટારા રાખવા રોકી, બટુકજી !’
‘મીઠી તમારી વાણી, પોપટજી !
વાતો તમારી શાણી, પોપટજી !’
‘સુખેથી ઊડતા રે’જો, પોપટજી !
ગીતોમાં રોજ નવું કે’જો, પોપટજી !’
શાળાનો ઘંટ જુઓ વાગે, પોપટજી !
ગાવાને ગીત નવા રાગે, પોપટજી !
મળશું હવે સાત વાગ્યે, પોપટજી !
મળશું ફરી સાત વાગ્યે, પોપટજી !