યાત્રા/સપ્ત રાગ: Difference between revisions

{{Heading|સપ્ત રાગ|}}

અહા, મીઠી મીઠી સ્વરધુની ઝરે અદ્રિ ઉરથી,

સુમન્દા આછેરી મૃદુ કલવતી, અશ્મ પથના

અહા, મીઠો મીઠો સુરભુવન આમેદ વહતા

તને પીધો પીધો, અયિ તિલક કામોદ મહતા!

લચંતી સાથી ક્ષિતિ ઉભરતાં આમ્ર તરુ શાં,

અને રક્તશ્યામે ફલથી લસતાં જંબુવન ત્યાં,

સમસ્તાં ભોજ્યોના મધુભૃત મહા પુદ્‌ગલ સમ

તને પ્રાશ્યો પ્રાશ્યો સભર રસ, કેદાર પરમ!

ઉષાની સૌવર્ણી પિયળ નભને ભાલ પ્રગટી,

ખિલી કંકુવર્ણી સરવર જલે કૈં કમલિની,

ઉગંતી ઊર્મિનાં સ્ફુરણ ધરતી બાલસલિલા

સરિત્ જેવી દુર્ગા ઉર પર ઝિલી સૌમ્ય સુજલા.

ઝૂલે છે નૃપમંદિરે મદભર્યા માતંગ સાલંકૃત,

બાજે ભેર ગભીરઘોષ, સ્વનતી કૈં રાગિણી ઉત્કટ,

એવો ભવ્ય બલિષ્ઠ ગૌરવ ભર્યો ઉદ્દીપ્ત-ઓજસ્ સદા,

પ્રૌઢપ્રાણ બૃહત્ શ્રવ્યો શું દરબારી કન્નડો સૌખ્યદા.

નીલ શ્યામ નિરભ્ર ઘુમ્મટ ઢળ્યો આકાશનો, આવરી

સર્વે પ્રાન્ત દિશા તણા, દગ મીંચી આત્મસ્થ સંધ્યા થઈ,

ઊંડી ભવ્ય પ્રલંબ પ્રોન્નત શિરે રેલંત નીરચ્છટા

ગાહી એમ અખૂટકોષ રસની મેં માલકોષી ઘટા.

ઊંચા નીલા શિબિર સરખા દેવદારુ-નિકુંજે

કૈલાસે ત્યાં મરકત મઢી નૃત્યની રંગપીઠે

એવો તેજી સ્તનત ઘન શો શંકરે સૃષ્ટ મિષ્ટ,

મેં આરોગ્યો શિશુ સમ બની શંકરા કો બલિષ્ઠ!

લીલા નીલમ પાટ શાં જલ ઠર્યાં ઊંડા અગાધે સરે,

ઝકી તીર કદંબકુંજહૃદયે પોઢેલ ત્યાં વાયુએ

એવી મીઠી શ્રવણપુટને પૂરતી તો ય ખાલી

રાખી નિત્યે ઉર ઉછલતી દેશીની સ્વર્ણ પ્યાલી.

<br>