અર્વાચીન ગુજરાતી કાવ્યસંપદા/વિનોદ જોશી/કાચી સોપારીનો કટ્ટકો
Jump to navigation
Jump to search
કાચી સોપારીનો કટ્ટકો
વિનોદ જોશી
એક કાચી સોપારીનો કટ્ટકો રે
એક લીલું લવિંગડીનું પાન
આવજો રે... તમે લાવજો રે... મારા મોંઘા મે’માન.
એક કાચી સોપારીનો...
કાગળ ઊડીને એક ઓચિંતો આવિયો
કીધાં કંકોતરીનાં કામ
ગોતી ગોતીને આંખ થાકી રે બાવરી
લિખિતંગ કોનાં છે નામ?
એક વાંકી મોજલ્લલડી ઝટ્ટકો રે
એક ઝાંઝરનું ઝીણું તોફાન
ઝાલજો રે... તમે ઝીલજો રે... એનાં મોંઘાં ગુમાન.
એક કાચી સોપારીનો...
ઊંચી મેડી ને એના ઊંચા ઝરૂખડા
નીચી નજરુંના મળ્યા મેળ
ઉંબરમાં સાથિયા ને ટોડલિયે મોરલા
આંગણમાં રોપાતી કેળ!
એક અલ્લડ આંખલ્લડીનો ખટ્ટકો રે
એક હૈયામાં ઊઘલતી જાન
જાણજો રે... તમે માણજો રે... એની વાતું જુવાન.
એક કાચી સોપારીનો...