કાવ્ય-આચમન શ્રેણી – મકરન્દ દવે/૩૩. ભીતર ભગવો

૩૩. ભીતર ભગવો

ભીતર ભગવો લ્હેરે રે
        મારા હરિવરની મ્હેરે.

જીવતેજીવ વ્હાલે ચિતા જલાવી
        ને હોમ્યાં અંગેઅંગ,
જ્યાં જોઉં ત્યાં ઝળહળે હવે
ગુપત ગેરુ રંગ :
દુનિયાને સબ ડેરે રે —
મારા હરિવરની મ્હેરે.

કાળનો એક કબાડી ઊભો
        હાટવાટે વિકરાળ,
કોઈ ધ્રૂજે, કોઈ ધ્રુસકે, હું તો
        તાળી દઉં તત્કાળ :
             ઈ તો ખોટુકલો ખંખેરે રે —
        મારા હરિવરની મ્હેરે.

અમી વરસે મેહુલા, જ્યારે
         ભીતર થાય ભસમ,
ભડકામાં મેં તો ભાળ્યું, વીરા!
             લીલું લીલુંછમ :
              હું હેરું, કોઈ હેરે રે —
               મારા હરિવરની મ્હેરે.

૨૭-૬-’૬૪ (સંગતિ, ૧૯૬૮, પૃ. ૩)