બાળ કાવ્ય સંપદા/કારેલાની કિટ્ટા, બટાકાની બુચ્ચા

કારેલાની કિટ્ટા, બટાકાની બુચ્ચા

લેખક : ઉદયન ઠક્કર
(1955)

ખમીસમાં ચટાપટા પપ્પા, હું તો વાઘ
જીવ હોય વહાલો તો અહીંયાંથી ભાગ !

ત્રણ મારા ખાસ દોસ્તઃ રામ, નટુ, રિંગો
તમારે થવું છે મારા ભાઈબંધ ? ડિંગો !

મમ્મી પૂછે, જોઈએ કે તાજો તાજો નાસ્તો ?
હરખાઈને હું બોલું, હાજી, હાજી, હાસ્તો !

 ચારેબાજુ ચપોચપ ચોપડાનો થપ્પો
કાં તો હશે છાપાંવાળો, કાં તો મારો પપ્પો !

કોઈ શાક ભલાં-ભોળાં, કોઈ શાક લુચ્ચાં...
કારેલાની કિટ્ટા અને બટાકાની બુચ્ચા !