બાળ કાવ્ય સંપદા/ચાડિયાનું ગીત
Jump to navigation
Jump to search
ચાડિયાનું ગીત
લેખક : કૃષ્ણલાલ શ્રીધરાણી
(1911-1960)
ઊડો કાબર, ઊડો ચકલાં,
ઊડો મેના પોપટ મોર;
હું આ ખેતરનો રખવાળો,
સઘળાં પેઠાં ક્યાંથી ચોર ?
થોર તણી આ વાડ ઉગાડી,
છીંડે બાવળ-કાંટ ભરી;
તોય તમે ક્યાંથી અહીં આવ્યાં ?
સંતાકૂકડી કેવી કરી ?
ઊડો કહું છું એટલું, હું શાણો રખવાળ;
ખેડૂત આવી જો ચડે, ગોફણ ઘાવ ઉછાળ.
મોતી-મૂઠશાં ડૂંડાં ઝૂલે,
લીલો નીલમડો શો મૉલ;
દાણો ઓછો એક ન થાશે,
માલિકને મેં દીધો કૉલ.
ખેડૂત આવે, ઊડી જાઓ,
એ જાતાં હું સાદ કરીશ;
ખોટા ખોટા ડોળા ફાડી,
છુપાઈને દાણા ધરીશ.
ઊડો કાબર, ઊડો ચકલાં,
ઊડો મેના પોપટ મોર;
હું આ ખેતરનો રખવાળો,
સઘળાં પેઠાં ક્યાંથી ચોર ?