બાળ કાવ્ય સંપદા/ડાળ હીંચકો
Jump to navigation
Jump to search
ડાળહીંચકો
લેખક : સુરેશ દલાલ
(1932-2012)
ઝાડની ડાળે ઝૂલતા રહે ચાંદો, સૂરજ, તારા !
એક પછી એક હીંચકે એના આવે છે હીંચનારા !
સૂરજ લીલી ડાળની ઉપર
બાંધે કિરણદોરી :
ચાંદો આવી આગિયા સાથે
કરતો રહે શિરજોરી.
તા૨લાઓ તો પાંદડાં સાથે રોજ રાતે રમનારા :
ઝાડની ડાળે ઝૂલતા રહે ચાંદો, સૂરજ, તારા !
સૂરજ આવે હીંચવા ત્યારે
પંખી ગાયે ગીત :
ચાંદને જોઈ રાતરાણીના
ચ્હેરા ઉપર સ્મિત
હીંચકા માટે બાગમાં લડે ભમરાઓ ભમનારા :
ઝાડની ડાળે ઝૂલતા રહે ચાંદો, સૂરજ, તારા !